Maríanna og Þráinn

I'm back

Thu, 28 Aug 2008 19:31:22 GMT

Ætli maður verði nú ekki að skrifa e-ð hingað inn svona annað slagið fyrir ykkur dúllurnar mínar. Ég er sem sagt komin aftur til Kaupmannahafnar og byrjuð á 5.önn í skólanum, vá hvað tíminn líður hratt. Það var nokkuð notalegt að vera á Íslandi í sumar en samt mjööög gott að komast aftur í H-407. Starfsþjálfunin á Reykjalundi í maí og júní gekk mjög vel. Ég var svo velkomin þarna og lærði alveg heilan helling. Fann mjög mikla tengingu yfir í námið mitt þó það sé svona nýtt og öðruvísi og ýtti í rauninni bara undir áhuga minn á því sem ég er að læra og það sem ég vil gera í framtíðinni.

Restina af sumrinu var ég svo hjá gömlu góðu Vegagerðinni eins og 10 síðustu sumur... jebb ég fékk áfall þegar ég fattaði það. Spurning um að breyta aðeins til annað slagið!!! Elena Margrét Þráinsdóttir var svo hjá okkur í 3 vikur í lok sumars og var það æði eins og alltaf en rosa erfitt að kveðja, eins og alltaf.

Systur mínar ákváðu svo í sameiningu að búa til börn og eru því báðar preggó núna og eru skrifaðar með ca 2 vikna millibili. Illa gert af þeim að skilja svona útundan;) Elfa á að eiga í lok desember og Ragna Laufey í janúar. Sónarmyndir sýna Stelpu Elfu/Ögmundsdóttir og Strák RögnuLaufeyjar/Ómarsson gaman gaman!!!! En það verður samt erfitt að vera svona langt í burtu frá þeim báðum :cry:

Núna er ég bara ein hérna í H-407 því Þráinn er ennþá á Íslandi að vinna, en hann kemur til mín 3.sept. Mér leist ekki nógu vel á þetta þarna eftir að ég fór því það var alltaf verið að bjóða honum nýjar vinnur á Íslandi þannig að ég tók bara af skarið og bókaði flugið fyrir hann svo ég myndi nú alveg örugglega fá hann aftur :haha: Nú þarf bara að finna vinnu handa honum hérna. En ég er ekkert búin að ná að verða neitt rosalega einmana því Kristín&Oddur hafa verið dugleg að bjóða mér í mat og svo var Hlínsa hjá mér í 5 nætur.

Skólinn byrjaði með látum, verkefni á verkefni ofan. Enginn tími til að anda. Í næstu viku á ég svo að halda opin fyrirlestur í skólanum þar sem ég kynni starfsþjálfunina mína. Pínu stressandi, en örugglega ekkert mál. En ég ætla að halda áfram með síðasta verkefni vikunnar sem er ímyndaði clientinn minn hann Filipo frá Ítalíu sem er 52 ára offitusjúklingur og er komin með sykursýki 2 dúddúrúú....

Kveðja Maríanna

P.S. Langar að auglýsa eftir fólki sem vill verða tilraunadýr í skólanum mínum. Okkur bekknum vantar einstaklinga til að leiðbeina í sept/okt. Manneskjan þarf að vera með háan BMI stuðul, helst yfir 30, búa í Köben eða nágrenni og geta talað ensku eða dönsku. Anyone???

Búið í bili

Mon, 26 May 2008 19:56:47 GMT

Erum á Íslandi og nennum ekki að blogga. Skrifum kannski e-ð hingað inn þegar við komum aftur til Köben í haust.

M&Þ

Ekkert

Mon, 17 Mar 2008 20:04:26 GMT

Þá er það komið á hreint, við Þráinn verðum á Íslandinu í sumar. Bókuðum flug áðan og munum við lenda 2.maí. Við vitum ekki hvað við verðum lengi og keyptum við því bara miða aðra leið í bili, svo kemur í ljós seinna hvenær við förum aftur til baka en ég býst við að það verði ekki fyrr en í ágúst. Þetta þýðir að íbúðin okkar mun standa auð í allt sumar en við erum opin fyrir því að leigja hana út ef einhver sem við þekkjum og treystum vill vera í henni. Ef enginn vill vera í henni í allt sumar að þá kannski leigjum við hana bara til vina og vandamanna sem fara í helgarferðir til köben.

Við kíktum út á lífið á laugardaginn og var það rosa stuð. Ég var með smá stelpu partý heima og Þráinn fór í afmæli til Gunna vinar síns og svo fórum við stelpurnar líka í afmælið eftir nokkra drykki og mjög svo fyndin 90´s danspor í boði Hlínar. Mjög svo skemmtilegt kvöld. Sunnudagurinn var svo tekinn í einn mesta leti sukk dag sem ég hef upplifað. Öresundscrew-ið (ég þráinn hlín oddur og kristín) lágum í einni klessu fyrir framan sjónvarpið í rúma 10 tíma og átum nammi, ís, snakk, pizzu, kfc og drukkum ógeðismikið af gosi. Ég er enn að jafna mig eftir þessa óhollustu.

Jæja ætla að halda áfram að vera í letingi í páskafríi
Bæ MæPæ

Fátækur námsmaður og atvinnulaus aumingi

Sun, 09 Mar 2008 16:20:22 GMT

Sælt veri fólkið
Langt síðan eitthvað hefur verið skrifað hérna og margt búið að gerast. Við Þráinn búin að kaupa okkur hús í úthverfi Kaupmannahafnar, gift og komin með 3 börn... líklegt! Nei nei ég held nú bara áfram að vera fátækur námsmaður og Þráinn er orðinn atvinnulaus aumingi. Honum var sagt upp í vinnunni um daginn vegna verkefnaskorts á stofunni og er hann því að leita sér af annarri vinnu. Hann með nokkrar lausnir í pokahorninu. Segjum frá því þegar það mál leysist.
Ég er alltaf í skólanum og gengur bara vel. Í febrúar var ég í áfanga sem heitir Physical activity methods þar sem farið var í mikilvægi hreyfingar í tengslum við allskyns lífsstíls sjúkdóma og svo fórum við einnig örlítið í sports nutrition. Núna er ég í valáfanga á dönsku í íþróttafræði. Fagið er 50% verklegt og 50% bóklegt og erum við því bara oft í leikfimi í tímum að leika okkur, erum að læra að gera hreyfingarprógrömm fyrir mismunandi aldurshópa og erum því að læra allskonar skemmtilegar æfingar. Fórum t.d. í riverdance um daginn það var alveg einstaklega kjánalegt en skemmtilegt og svo fórum við líka í eltingarleik með lokuð augun, það var spes. Ég fer svo í einn áfanga í viðbót í apríl og þá er skólinn búinn í bili því ég er að fara í starfsþjálfun. Ég verð hjá Reykjalundi í 8 vikur í maí og júní hjá offitu og næringarsviði og er ég alveg ótrúlega spennt yfir því, verður örugglega mjög lærdómsríkt. Svo er restin af sumrinu óráðin, ekki vitað hvort ég verði á Íslandi (þó það sé líklegri kosturinn) eða hérna í Danmörku (sem er skemmtilegri en ópraktískari kosturinn).
Við fórum til californiu í janúar, nenni ekki að segja frá ferðinni því það er svo langt síðan en það var samt ógó gaman þar. Er löngu búin að setja inn myndir.

Man ekki meira, farin að læra

Bless

Maríanna

Myndir

Wed, 30 Jan 2008 19:28:37 GMT

Nýjar myndir frá Californiu á myndasíðunni okkar.

Mía

10

Wed, 16 Jan 2008 11:38:19 GMT

Prófið gekk mjög vel. Var nú óvenjuróleg yfir þessu þangað til á mánudagsmorgun, nokkrum tímum fyrir próf. Þá heltist yfir mig stressið. Var alveg viss um að heilinn hefði hent öllum upplýsingunum út yfir nóttina sem ég var búin að gefa honum. Mér fannst ég ekki muna neitt en gat samt ekki lesið yfir glósurnar. Gat ekki borðað og taldi að líf mitt myndi enda núna því ég væri svo vitlaus, nei nei ég er ekkert dramatísk!

Hitti nokkrar stelpur uppí skóla og einn kennara áður en ég fór inn. Þau voru öll svo ofurspennt að þau biðu á meðan ég var inni því ég var síðust þennan daginn. En svo gekk þetta bara svona rosalega vel, ég blaðraði og blaðraði í hálftíma... ég var greinilega líka fyndin því prófdómararnir hlógu bara og hlógu. Svo allt í einu var hálftíminn liðinn og mér hent út á meðan einkunnin var rædd... ennþá sátu allir frammi ofurspenntir með mér, kennarinn líka. Haldiði að ég hafi svo ekki bara fengið 10 takk fyrir halló. 10 hérna er kannski ekki alveg eins og á íslandi, en þetta er næst hæsta einkunnin núna eftir að danska einkunnaskalanum var breytt þannig að ég er mjög montin.

Stefnan er svo tekin á Californiu á morgun vúhúúú...

Bless

Maríanna

...

Thu, 10 Jan 2008 13:47:44 GMT

Sælt veri fólkið. Ég fékk yfir mig einhvern svakalegan blogganda og ákvað að nýta mér það. Er nú búin að vera svo dugleg að læra í dag, búin með dagsplanið og klukkan bara hálf 3:haha:

Langt síðan ég skrifaði e-ð hérna. Síðan þá er ég búin að gera margt og mikið. Nóvember og desember voru mjög busy mánuðir. Rosa mikið að gera í skólanum, var svo að skúra nokkur kvöld í viku og passa nokkra eftirmiðdaga líka. Ég skilaði lokaritgerðinni fyrir þessa önnina daginn sem ég fór til Íslands í jólafrí. Hún var um mína reynslu sem coach... veit ekkert hvernig hún kom út því ég fæ ekkert að vita hvað kennurunum finnst strax. Ég er að fara í munnlegt próf þann 14.jan og þá fæ ég að vita e-ð því einkunnin úr henni er 1/3 af lokaeinkunn. Ég fer sem sagt í hálftíma munnlegt próf þar sem ég á að verja ritgerðina og svara spurningum úr námsefni allrar annarinnar. Fæ svo einkunn strax. Er óvenju róleg e-ð yfir þessu öllu saman, annað en síðast, en stressið á alveg örugglega eftir að hellast yfir mig um helgina. Þráni finnst alveg æðislegt að búa með mér þegar ég tek mín taugaveiklunarköst fyrir próf:$

Það sem heldur í manni lífinu í þessum janúarlestri er hugsunin um að fara til Californiu, jebb förum til Rögnu Laufeyjar og Ómars þann 17.jan og verðum í 9 daga. Get ekki beðið. Fara í smá afslöppun svona áður en skólinn byrjar aftur, það var nefnilega engin afslöppun á íslandi um jólin... eða þannig. Borða góðan mat, versla og fara á snjóbretti, jibbíííí!

Ekkert endilega búast við reglulegum færslum hingað inn, ég blogga bara þegar andinn kemur yfir mig, sem er ekki oft.

Sjáumst seinna

Maríanna

Myndir

Mon, 07 Jan 2008 21:55:06 GMT

Var að setja inn tvö myndaalbúm, eitt af minni myndavél og annað af Þráins myndavél.

Nenni ekki að blogga

Maríanna

Coach Maríanna

Sun, 11 Nov 2007 16:30:55 GMT

Rólegri lærdómshelgi er að ljúka. Það styttist í lok annarinnar í skólanum og því er allt á fullu. Er að fara að byrja á lokaverkefninu fyrir þessa önnina. Danir eru ekkert allt of hrifnir af prófum eins og við á Íslandi þekkjum þau. Þeir reyna frekar að hræra öllu náminu saman í einn graut og búa til einhverjar krúsídúllur sem þeir kalla lokaverkefni. Lokaverkefni þessarar annar er ansi stressandi fyrir feimnu Maríönnu. Ég á að vera með 4x45min coaching session, á sem sagt að coach-a fyrstu annar nemanda. Þessi nemandi á sem sagt að koma með e-ð vandamál inní tímann til mín, health related, sem ég á að hjálpa til við að leysa. Ég er búin að fá nafnið á mínum client og er búin að hafa samband til að plana fyrsta sessionið en hún er ekki að svara mér, frekar pirrandi þar sem fyrsta sessionið á að vera í þessari viku. Í einum af þessum tímum á ég að vera með observer sem fylgist með hvernig ég fer að og hvort ég sé að gera rétt og svo á einn af þessum tímum að vera símatími. Eftir þessi 4 skipti á ég svo að skrifa ritgerð um mína upplifun og blablabla... voða danskt. Ég á að skila henni 20.des og svo á ég að fara í munnlegt próf úr þessu efni í janúar. Kennararnir er svo búnir að skreyta þetta ferli með allskonar umræðutímum, feedback tímum og fleiru.

Þeir sem ekki vita hvað coaching er (ég vissi ekki hvað það var áður en ég byrjaði) að þá fann ég rosa góða skýringu á því í bókinni minni:

"Coaching focuses on where people want to go, how they are going to get there, and how they are going to achieve outstanding results. Rather then where they have been or what has happened to them in the past. Coaching is more about asking the right questions than telling the client what to do. Coaches work with their clients to help them identify and construct possible solutions, delineate a range of goals and options, and then facilitate the development and enactment of action plans to achieve those goals."

Og þar sem ég mun kallast Lifestyle Coach að þá mun ég sem sagt vera að hjálpa mínum client við að breyta "health related behavior" að hans ósk. Ég á sem sagt ekki að segja honum hvað hann á að gera heldur hjálpa honum að finna það sem best hentar honum, hann er sérfræðingurinn í sínum líkama og ég á að spurja réttu spurningana til að hjálpa honum að finna sína bestu lausn á vandanum. Það sem virkar fyrir einn, virkar ekki endilega fyrir annan. Svo er líka hægt að vera life coach, health coach, coaching psychologist og allskonar fleira, en ég mun vera lifestyle coach.

Þá eruð þið búin að fá nánari útskýringu á mínu námi. Ég veit ekki hvað coach myndi yfirfærast á íslensku... og nei þetta er ekki þjálfari eins og við myndum þýða orðið beint. Veit ekki hvort þessi starfstétt sé til á Íslandi en þetta er rosa vinsælt hérna í Danmörku og í USA veit ég. En þetta er voða nýtt allt saman og þetta heiti er ekki verndað og því getur hver sem er kallað sig coach. Það gerir þetta allt mikið erfiðara því við þurfum að læra að skera okkur úr hópnum, þetta er 3 1/2 árs háskólanám hjá okkur og það yrði mjög pirrandi að sjá einhvern plebba útí bæ kalla sig coach eftir að hafa farið á 2 vikna námskeið.

En best að halda áfram að undirbúa sig undir krúsídúllu lokaverkefnið

Kveðja Maríanna

Hitt og þetta

Mon, 29 Oct 2007 16:40:31 GMT

Ömurlegur mánudagur í gangi. Rigning og leiðindaveður, brjálað að gera í skólanum og ég komin með kvef og einhvern dularfullan verk í öxlina. Á svona dögum á maður bara að liggja uppí rúmi með popp og kók og horfa á Greys, en enginn tími fyrir það.

Síðasta vika var ansi skemmtileg, fullt af gestum og rosa stuð. Hápunkturinn var auðvitað Elena Margrét Þráinsdóttir. Hún var hjá okkur í rúma viku og skemmtum við okkur konunglega hérna í Köben og Lalandia. Hún er alltaf jafnmikið yndi, bræddi alla með sínum skemmtilega húmor eins og vanalega. Þó það líði oft langt á milli heimsókna að þá lætur hún alltaf eins og hún hafi hitt okkur í gær. Það voru teknar ansi margar myndir, Þráinn alveg óður á vélinni og setti ég bara brot af þeim á netið... aðeins 128 myndir!

Hildur og Krúsi eignuðust litla stelpu í gær. Koss og knús til litlu fjölskyldunnar í Malmö, við bíðum eftir grænu ljósi á að fá að koma í heimsókn. Ég vann veðmálið og á ég því inni 3 rauðvín frá Hrebbnu, Hlín og Þráni. Þráinn og Hrebbna eru ekki alveg að kaupa það að þetta sé stelpa og ætla að halda áfram að kalla barnið Guðmundur.

RL systirin í Ameríkunni er að brillera í skólanum og komst inní mastersprógrammið, ein af mjög fáum. Koss og knús til hennar. En aftur á móti var ég að fá mína fyrstu falleinkunn á ævinni (fyrir utan fræga stærðfræðiprófið í 8.bekk þar sem ég fékk 3.6). Eitt hópverkefnið sem við gerðum núna um daginn var greinilega ekki nógu gott, ég á eftir að fá nánari útskýringu á þessu en ég fer í viðtal á morgun og þá fáum við hópurinn að vita betur hvað fór úrskeiðis. Erum soldið hissa á þessu því okkur fannst þetta bara ansi fínt verkefni. Þessi kennari er mjööög strangur og smámunasamur og þarf oft lítið til að draga mann mikið niður. En við fáum sennilega að lagfæra það og skila því aftur, maður fær endalausa sjensa hérna í Danmörkunni.

Jæja þarf að rjúka

Maríanna

Hæææ!

Mon, 08 Oct 2007 17:55:57 GMT

Ég er búin að finna fyrir mikilli pressu frá ákveðnum aðila að halda þessu bloggi áfram, hóst*mamma*hóst!

Margt og mikið búið að gerast. Skólinn alveg á milljón að demba á okkur verkefnum fyrir haustfrí. Haustfríið er í næstu viku hjá mér, veit ekkert hvað ég á að gera af mér þá. Það er alveg væri alveg tilvalið að fá heimsókn á þeim tíma ;) Að vísu verður innrás frá Íslandi þegar fríinu mínu lýkur. Mamma og pabbi ætla að koma 19.okt og foreldrar Þráins, Anna Sif og Elena Margrét koma 20.okt. Það verður örugglega rosa stuð þá. Búið að plana verslunarferðir, átveislur og ferð í Lalandia.

Ég er alltaf á fullu í ræktinni og fer ca 3-4 sinnum í viku. Hef að vísu ekki getað það undanfarnar 2 vikur því hnéð er búið að vera að pirra mig síðan ég fór í spinning fyrir tveim vikum. En ég reyni nú samt að fara og æfi þá aðallega bara eftir búk. Með því áframhaldi þá verð ég mega mössuð að ofan en eins og ræfill að neðan, smekklegt!

Ég er ennþá alltaf að passa. Sæki Völu og Tomma á leikskólann og er með þau fram að kvöldmat tvisvar í viku allavega. Þau eru svo miklar dúllur. Svo var ég að byrja að vinna í síðustu viku við skúringar líka. Var öll kvöld í síðustu viku en ætla að reyna að fá að vera 2-3 kvöld í viku. Fínt að fá smá aukapening.

Við Þráinn erum búin að vera að gæla við það að flytja í aðra íbúð hérna í köben. Er alveg að fá grænar bólur á að búa hérna á kollegiinu. En þar sem við erum svo nísk og tímum ekki að borga mikið hærri leigu að þá ætlum við að reyna að sætta okkur við þessa holu í 2-3 ár í viðbót. En í staðinn ætlum við að fara að kaupa okkur falleg húsgögn smám saman sem við myndum taka með okkur þegar við flytjum heim:haha: Reyna að gera þetta meira kósý hérna og reyna líka að spara pening svo maður geti komið sér fyrir á Íslandi þegar kemur að því. Ætlum að vísu að athuga hvort við getum fengið örlítið stærri íbúð hérna á kollegiinu, þetta er farið að verða soldið þröngt, 36 fermetrar er ekkert svaka mikið skal ég segja ykkur. Maður heldur alltaf áfram að sanka að sér drasli og vill ekki að henda neinu.

Þráinn er alltaf að vinna bara á sinni stofu. Þau voru að flytja í nýtt húsnæði á Nörrebro og er því orðið aðeins rýmra um þau, þetta var soldið þröngt þarna í kjallaranum hjá eigendum stofunnar. Hann er mjög sáttur þarna og ætlar sér að vera þarna þangað til við flytjum heim, sem er ca í byrjun árs 2010 ef allt gengur upp hjá mér.

Man ekki eftir neinu meiru. Ef ég á að halda þessu bloggi áfram að þá vil ég fá að vita hverjir eru að lesa svo endilega kommentið. Nenni ekki að skrifa bara fyrir mömmu, get alveg hringt í hana og sagt henni fréttir.

Þráinn uppvaskari biður örugglega að heilsa.

Kveðja Maríanna

Myndir

Sat, 01 Sep 2007 18:24:49 GMT

Var að setja inn myndir frá sumrinu

ENJOY

Mía

Komin aftur...

Wed, 22 Aug 2007 11:51:24 GMT

... til köben. Það var mjög fínt að vera á íslandi en alveg rosa gott að vera komin aftur hingað í íbúðina okkar. Skólinn byrjaði á mánudaginn og skólaárið byrjaði vel hjá mér, var veik fyrsta daginn. Missti af kynningardeginum og píptestinu (óheppin ég!) Mætti svo í gær ennþá hálflasin og hóstaði bara á allt liðið... pirrandi gella! Fékk illt augnaráð og laumaði mér því út annað slagið þegar hóstaköstin komu. Frétti svo að ljósmyndari frá Berlingske Tidende hafi verið að taka myndir af þeim þegar þau voru í píptestinu og eiga þau von á myndum af sér sveittum og ógeðslegum í blaðinu á næstu dögum híhíhí...

Þessi önn lítur bara vel út, skemmtileg fög í gangi. Margir verklegir íþróttatímar þar sem verið er að kenna okkur að gera allskonar mælingar. Við munum hlaupa 5km í september þannig að eins gott að byrja að æfa sig strax, það er nú einu sinni margfaldur heimsmeistari í hjólreiðum og tour de france sigurvegari með mér í bekk. Við förum í spinningtíma til hennar bráðum líka 8|

KK stelpurnar koma svo á morgun, vííí hvað ég hlakka til. Við munum örugglega mála bæinn rauðan. Planið er að borða góðan mat, versla, drekka nokkra öl og örlítið af kokteilum :haha:

Nenni ekki að skrifa meira, nenni eiginlega ekki að vera með þetta blogg. Kannski verður þetta bara síðasta færslan.

tata

Mía

Maríanna líka klára

Tue, 12 Jun 2007 09:34:59 GMT

Þá er þetta próf loksins búið og gekk vonum framar... fékk 10! Hélt ég myndi hoppa hæð mína þegar kennarnir sögðu þetta, þeir hlógu bara og hlógu af mér því ég lét eins og vitleysingur. En ég held ég hafi aldrei á ævi minni verið jafnstressuð fyrir próf, ég var virkilega að farast úr stressi. Svaf lítið í nótt og gat ekkert borðað. Hitti svo krakkana sem voru með mér í hóp og þau voru á undan mér og fengu bæði 10 líka þannig að ég gat ekki verið minni manneskja og fengið e-ð lægra sko... en það stressaði mig enn meira upp. Þannig að það er svolítið spennufall núna og veit ég ekkert hvað ég á að gera... kannski ég fari bara út í sólbað, enda rosa hiti úti

Jibbí

Maríanna

Þráinn klári!

Thu, 07 Jun 2007 07:19:27 GMT

Þá er ég búin að endurheimta hann Þrása minn. Hann kláraði lokaverkefnið sitt í gær og flutti það og fékk 8. Hann var bara mjög sáttur með það því hann tók smá áhættu með að hanna húsið sitt sjálfur, vildi sýna smá arkitekta-takta og það tókst og fékk hann mikinn plús fyrir það. Til hamingju Þráinn! Þetta þýðir að Þráinn er orðinn byggingafræðingur og byrjar að vinna sem slíkur í dag hjá Gassa Arkitektum hérna í Köben, sem er fyrirtæki í eigu Íslendinga. Þráinn er lítið búinn að sjást hérna heim síðustu vikurnar og er ég því mjög fegin að vera búin að fá hann aftur, ég meina ekki nenni ég alltaf að vaska upp ;) Hann svaf ekkert í tvo sólarhringa fyrir prófið, kom svo heim eftir prófið og lagði sig í 3 tíma og svo dró ég hann með mér í Ikea til að kaupa kommóðu undir fötin okkar. Vorum með kommóðu í láni en vorum að skila henni og fötin okkar því í ferðatöskum og á gólfinu. Þráinn var bara nokkuð brattur þrátt fyrir lítinn svefn og splæsti hann í flottustu kommóðuna í Ikea, ég er ástfangin af henni! Stundum tek ég svona ástfóstri á hlutum og er kommóðan nýjasta barnið mitt, hlakka til þegar búið er að setja hana saman. Tek mynd af henni til að sýna ykkur og ekki reyna að segja mér að þetta sé ekki flottasta kommóða sem þið hafið séð!

Lokarprófið hangir enn yfir mér, stutt í það núna. Allir að hugsa fallegar hugsanir til mín þriðjudaginn 12.júní klukkan 10:10-10.40. Markmið þessarar annar er ekki há einkunn eins og ég set mér fyrir vanalega, þó það væri auðvitað stór plús, eeeen ég verð að vera raunsæ því ég er engan veginn með þetta efni á hreinu því það er bara svo rosalega leiðinlegt og því er markmiðið bara að ná þessu svo ég geti haldið áfram. Á næsta ári eru rosa skemmtilegir áfangar. Línan sem ég valdi mér heitir "Lifestyle Coaching and Fitness Management" og áfangarnir á næstu önn heita: "Counselling and Coaching Method", "Lifestyle Change Theory and Models" og "Exercise Physiology." Spennó ekki satt!?

Ég er búin að vera að reyna að útiloka sumarið þegar ég er að læra, íbúðin okkar snýr þannig að sólin skín beint inn um gluggana þegar er sem heitast úti og því verður alveg ógeðslega heitt inni. Er samt alltaf með alla glugga opna og viftuna á fullu, svo þegar ég verð alveg geðveik á þessu að þá dreg ég bara fyrir svo ég sjái ekki sumarið úti. En pant hafa sól frá 12.-16. júní... svo er mér alveg sama hvernig veðrið er frá 16.júní til 23.ágúst því þá verð ég á íslandi að vinna. Svo 23.ágúst panta ég sólina aftur svo við KK stelpur getum haft það næs.

En núna ætla ég að fara að læra og tala við sjálfa mig til að æfa mig fyrir munnlega prófið mitt.

Vi ses

Mía

Mamma er þetta nógu stórt letur fyrir þig?